May yara na sang person of interest ang kapulisan sa nasapwan patay nga anay Overseas Filipino Worker (OFW) sa sulod sang balay sa Barangay Taft, Tapaz, Capiz.
Ang biktima amo si alyas “Jove”, babaye, 34 anyos, residente sang Barangay Nayawan, Tapaz, Capiz kag temporary nga nagatinir sa balay sang iya manghod sa Barangay Taft sa nasambit nga banwa.
Sa interview sang Bombo Radyo kay PMAJ. Gregg Anthony V. Salbang, Officer-in-charge sang Tapaz Municipal Police Station, iya ginpahayag nga base sa autopsy report sang biktima ang naangkon sini nga buno sa tunga sang iya dughan amo ang gintunaan sang iya kamatayon.
Suno sa iya, base man sa panaysayon sang utod sang biktima, ginapahayag nga pasado alas 10 sang gab-i nakit-an nga may kaistorya sa cellphone ang biktima.
Dugang pa sang natungdan, wala man sang may narekober nga ano man nga sahi nga gingamit sa pagpatay sa biktima.
Nahibaluan nga sang nagligad lang nga tuig nagpuli ang biktima para magbakasyon kag naga process na kuntani sang mga papeles agud nga magbalik liwat apang nasapwan na lang ini nga wala na sang kabuhi.
Sa subong, padayon pa ang imbestigasyon sang kapulisan agud matumod kon sin o ang yara sa likod sang pagpatay sa nasambit nga biktima.
Nagpanawagan man ini sa mga pumuluyo nga magkooperar sa ila kun may yara sang nahibaluan ga impormasyon angot sa insidente.
