Kapulisan, may yara na sang person of interest sa pagtiro sa 45-anyos nga babayi sa sulod sang bus sa banwa sang Ivisan

IVISAN, CAPIZ – May yara na sang person of interest ang kapulisan sa pagtiro sa 45-anyos nga babayi sa sulod sang bus sa Barangay Mianay, Ivisan, Capiz.

Ini ang ginpahayag ni Police Major Ruby Magallanes, Hepe sang Ivisan Municipal Police Station sang mainterview sang Bombo Radyo.

Suno kay Magallanes, ginalantaw nila nga motibo sa pagpangluthang nga posible may dumot ukon kaakig sa biktima ang mga suspetsado.

Dugang pa sini nga ginahulat nila sa karon nga mag-ayo ang biktima agud maistorya angut sa natabo.

Matandaan nga nag-angkon sang pilas sa tiyan ang biktima matapos gintiro sa sulod sang bus sang wala pa matumod nga mga suspek.

Sa karon padayon pa ang maid-id nga imbestigasyon sang mga kapulisan angut sa nasambit nga insidente.