ROXAS CITY – Wala pa sang outbreak sa kaso sang Dengue sa probinsya sang Capiz, apang ginatutukan sa karon sang Department of Health-Capiz ang pagtapna sa paglapta sang nasambitan nga balatian.
Sa interview sang Bombo Radyo kay Mr. Joeffrey Espiritu, Development Management Officer IV kag tagpamaba sang DOH-Capiz, ginpahayag sini nga sandig sa ila datos sumugod Enero 1 tubtob Mayo 21, 2022, may yara sang 103 ka mga nabalhag sa 17 tanan ka LGU’s kalakip ang Roxas City.
Manubo ini nga numero sang 8 porsyento sa datos sang nagligad nga tuig sa kapareho nga binulan.
Pinakamataas ang 43 ka mga kaso sang Dengue sa syudad sang Roxas kag pinakamanubo sa Dumalag, Panit-an kag Panay nga may tag-isa, wala man sang narekord nga napatay sa amu nga sakit.
Ginpahayag man ni Espiritu nga mahimo makuha ang sakit nga Dengue kun makagat sang lamok nga aedes eagypti ukon aedes albopictus, nga masami makita sa mga matin-aw kag wala nagahulag nga tubig ukon stagnant water, kaangay sang gin-stock nga tubig sa balde nga wala sang takup.
Pila sa sintomas kun ang isa ka tawo ang may balatian nga Dengue amu ang lagnat, pagpalanakit sang ulo kag kalawasan ukon kasu-kasuan, pagpalanuka, wala gana sa pagkaon, kag nagaangkon sang rashes.
Kinahanglan nga mangin malimpyo sa palibot, magsuksok sang mahaba nga panapton kag magpabakuna, agud malikaw sa nasambit nga balatian.
