ROXAS CITY – Masobra sa triple ang pagtaas sa numero sang mga nalatnan sang Hand-Foot-and-Mouth disease (HFMD) subong nga una nga duha ka bulan sang 2023, ikumparar sa kaangay nga tion sang 2022.
Ini ang ginkumpirma ni Mr. Joeffrey Espiritu, Development Management Officer IV kag tagpamaba sang Department of Health (DOH) Capiz, sang mainterview sang Bombo Radyo.
Suno diri, sandig sa monitoring sang ila ahensya, sumugod Enero 1 tubtob Pebrero 25, 2022 nakabalhag ang probinsya sang 78 ka mga kaso sang HFMD, samtang sa kaangay nga tion subong nga 2023, may yara na sang 246 ka mga kaso, nga nagtaas sang 212.82%.
Ginpahayag man ni Espiritu nga kadam-an sa mga pasyente sang amu nga balatian amu ang mga kabataan naga-edad 1 tubtob 4 katuig nga may 154 ka mga kaso; ginasundan sang mga nagapang-edaron sa 5 tubtob 9 katuig nga may 53 ka mga kaso kag naga-edad 10 tubtob 19 anyos nga may yara sang 8 ka mga kaso sang HFMD.
Madasig man ini nga maglapta ilabi pa kun indi malimpyuhon sa lawas ang isa ka tawo.
Gani panugyan ni Espiritu sa mga ginikanan kag subong man sa mga manunudlo sang mga naga-eskwela nga kabataan nga i-monitor ang ila mga estudyante kag kun may makit-an nga nagabatyag sang sintomas sang HFMD ang gilayon nga i-isolate agud indi na makalaton pa.
