Padayon nga nagasaka ang kaso sang Hand, Foot and Mouth Disease sa probinsya sang Capiz suno sa Department of Health Capiz.
Sa interview sang Bombo Radyo kay Mr. Joeffry Espiritu, Development Management Officer IV kag Information Officer sang Department of Health – Capiz iya ginpahayag nga nagdangat na sa 1,001 ang mga kaso sang Hand, Foot and Mouth Disease, mas mataas kun ipaanggid sa 163 ka kaso sang nagligad nga tuig.
Suno kay Espiritu, ang syudad sang Roxas ang may pinakamataas numero sang kaso nga yara na sa 196, ginasundan sang banwa sang Mambusao nga may 105 ka kaso kag banwa sang Tapaz nga may 86 ka kaso.
Pahayag pa niya, mga kabataan ang kalabanan nga nagakaigu-an sang amo nga balatian gani siguruhon ang katinlo sang palibot.
Dugang pa ang natungdan, bangud contagious ukon makatalapon ang nasambit nga balatian, ginahinyu gid ang tanan nga kun makabatyag sang mga sintomas ang gilayon na nga mag-isolate agud malikawan ang paglapta.
