ROXAS CITY, CAPIZ- Ginpakigbahin sang isa ka health worker ang importansya sang ihibalo sang publiko natuhoy sa balatian nga Human Immunodeficiency Virus (HIV) kadungan sang pagselbrar sang World Acquired Immune Deficiency Syndrome (AIDS) Day.
Sa interview sang Bombo Radyo kay Nurse Carlo Paolo H. Bermejo, Health Program Officer sang Capiz Provincial Health Office, iya ginpahayag nga katuyuan sang nasambit nga programa ang maghatag sang paandam kag ihibalo sa publiko agud makalikaw sa amo nga balatian.
Suno kay Bermejo, nagapadayon ang pagtaas sang kaso sang HIV sa Pilipinas, lakip na sa Western Visayas nga may yara sang 6,651 tanan ka mga indibidwal ang nagakabuhi nga may kasubong nga balatian sandig sa Agosto 2025 nga datos subong man ang probinsya sang Capiz, may yara sang 965 tanan ka mga HIV cases sa kapareho man nga panahon nga narekord.
Pahayag niya, ang nasambit nga balatian mahimo nga matapna pamaagi sa paggamit sang condoms, regular HIV testing, kag konsepto sang U=U (Undetectable = Untransmittable) para malikawan ang paglaton sang virus bangud nga nagakakuha ini pamaagi sang unprotected sexual intercourse, mother to child transmission kag exposure sang isa ka tawo sa kontaminado nga blood products.
Ginsiling man sini nga may yara sang lokal nga serbisyo para sa mga tawo nga nagakabuhi nga may kasubong nga balatian (PLHIV), lakip ang counseling kag support groups. Ginaganyat ang komunidad nga pakigbatu-an ang stigma kag discrimination.
Nagpalab-ot naman sang mensahe ang natungdan sa publiko, ilabi na sa mga pamatan-on nga kinahanglan nga may yara sang ihibalo sa amo nga balatian agud nga malikawan ini kag indi na magdamo pa.
Interviewed by Bombo Jessa Mae Siman De Los Santos
