ROXAS CITY, CAPIZ – Kadungan sa pagselebrar sang Fire Prevention Month sa kada bulan sang Marso, nagpahanumdom ang katapo sang bombero sa probinsya sang Capiz nga indi lamang sa sini nga bulan ang paghalong batuk sa sunog, kundi adlaw-adlaw.
Ini ang ginpahayag nanday SFO1 Junemar Galve, Chief Public Information Officer-BFP Roxas City kag SFO2 Reynold Agda, Station Commander sang Lawaan Fire Sub-Station
Sa interview sang Bombo Radyo sa mga fire officers, ginpakigbahin sang mga ini ang ila programa kag inisiyatibo nga patigayunon para sa bulan sang Marso nga may tema “Sa pag-iwas Sa Sunog, Hindi Ka Nag-iisa.”
Ginpahayag diri ang mga tikang agud malikawan ang sunog, kaangay sa masami nga pagtsekyar sang ginsindihan nga kandila, kinahanglan nga ibutang sa lugar nga indi masunugon, tsekyaron nga wala sang may nakasaksak nga kagamitan, masami nga pagpatay sang tangke pagkatapos magluto kag iban pa.
Paalinton sang mga ini sa publiko nga gilayon ipahibalo sa ila talatapan kun may mga nagakahinabo nga sunog agud malikawan ang dako nga kahalitan, subong man ang pag-report kun may mga aksidente sa dalan, insidente sa kadagatan kag kun ano pa nga respondehan.
