ROXAS CITY-Natalana nga pasakaan sang panumbongon ang katapu sang Municipal Disaster Risk Reduction and Management Office ukon MDRRMO-Sapian matapos nga ginaalegar nagbato kag nagpangmulay sang mga pulis sa border checkpoint sa Barangay Bula, Mambusao, Capiz.
Sandig sa imbestigasyon sang Mambusao Municipal Police Station, magapadulong kuntani sa banwa sang Mambusao ang suspek nga si Jeffrey Pinalba, sang Barangay Poblacion, Sapian agud mabakal sang bulong.
Apang pag-abot sa border checkpoint, wala ini ginpasugtan nga maglusot bangud nagalapas na ini sa curfew hour kag magluwas diri namutikan nga yara ini sa idalom sang impluwensya sang makahulubog nga ilimnon.
Ginkaakig ini ni Pinalba rason nga ginaalegar ginmulay ini sang mga frontliners nga yara sa checkpoint.
Ginpakamaayo sang mga kapulisan nga arestuhon si Pinalba kag ginhunong sa karsel.
Natalana naman nga pasakaan sang panumbongon nga Oral Defamation kag Resistance and Disobedience to Person in Authority si Pinalba.
