TAPAZ CAPIZ – Pilason ang isa ka miyembro sang Philippine Army sa engkwentro nga natabo pasado alas 2:00 sang kaagahon subong nga adlaw, Agosto 22 sa Tapaz, Capiz.
Sa interview sang Bombo Radyo Roxas kay Col. Erwin Rommel Lamzon, Chief sang Public Affairs Office sang 3rd Infantry Division, ginpahayag niya nga isa ka pribado nga soldado ang napilasan sa nawala nga abaga kag yara na sa estable nga kondisyon.
Suno kay Lamzon, sa ikaduha nga encounter takna alas 9:27 sang aga, naglawig sang 20 minutos ang engkwentro kag naglagyo ang mga katapo sang rebelde nga grupo.
Sa operasyon, narekober sang militar ang duha ka M14 US rifle, isa ka M16 assault rifle, isa ka AK-47 assault rifle, kag isa ka M1 Garand rifle nga ginapahayag nga ginagamit pa sang panahon sang World War II.
Pahayag pa niya, posible may yara sang casualties ukon napatay sa pihak nga groupo, base sa mga armas nga narekober. Padayon naman ang ginapatigayon nga hot pursuit operation batok sa mga nabilin nga miyembro sang rebelde.
Nahibaluan nga gintingub nga puwersa sang 301st Brigade, 12th Infantry Battalion, 61st IB, 82nd IB, kaupod ang intel units, artillery, armor kag pila ka elemento sang Philippine Air Force ang nag-atubang sa mga nabilin nga miyembro sang Regional Sentro de Gravedad kag Central Front sang Komiteng Rehiyon-Panay.
