MAMBUSAO, CAPIZ – Napasakaan na sang kaso ang kawatan nga nagsulod sa isa ka grocery store kag nagtaban sang kwarta kag pila ka pakete sang sigarilyo sa Poblacion Proper, Mambusao, Capiz.
Matandaan nga ang arestado amo si alyas Ronald, kag residente man sang nasambit nga lugar.
Sa interview sang Bombo Radyo Roxas kay PCAPT Dennis Losbañes, Officer in Charge sang Mambusao Municipal Police Station, kaso nga robbery ang ginpasaka sa nasambit nga arestado.
Suno kay PCAPT Losbañes, na-capture sang CCTV footage ang pagpangawat ni Ronald kun sa diin natigayon sini nga mataban ang P52,000 nga cash kag pinakete nga sigarilyo sa tindahan.
Gilayon naman nga nagpatigayon sang hot pursuit operation ang kapulisan kag nadakpan ang arestado.
Nagapabilin ini sa kostudiya sang Mambusao PNP para sa nagakaigo nga disposisyon.
– With a report from Bombo Sunnie Mae Constantino Batencila
