ROXAS CITY -Ginpanindugan sang tag-iya sang G. Arabia Platinum Construction and Development Company nga may yara nga ginbutang nga mga early warning devices kg signages sa ginaconstruct nga dalan sa Barangay Dayao, Roxas City.
Ini ang ginpahayag ni Mr. Gin Arabia, tag-iya sang nasambit nga construction company sang mainterview sang Bombo Radyo.
Ginpahayag ni Arabia nga may yara sang ginpadala sa iya nga mga laragway nga nagapamatud-od nga may ginbutang nga early warning devices kag signages antes natabo ang pila ka mga aksidente sa nasambit nga lugar.
Apang posible suno kay Arabia nga ginapapahigad sang pila ka mga motorista nga nagalabay ang mga early warning devices kag signages sa tion nga nagagutok ang trapiko sa nasambit dalan.
Magluwas diri, masami nga na-abtan sang mga tinawo sini nga yara sa higad sang karsada ang mga early warning devices kag mga signages.
Gindugang pa ni Arabia nga masami nga ginapangkuha man ang mga early warning devices kag signages sang mga indibidwal ilabi na kun maayo ang materyales nga gingamit sa pag-ubra sini.
Samtang ginkompirmar man ni Arabia nga natapos na ang construction sang amo nga dalan sa nasambit nga barangay.
