ROXAS CITY – Nakalab-ot na sa probinsiya sang Capiz ang kontrobersiyal nga KAPA Community Ministry International Inc. ukon Kabus Padatoon.
Sa impormasyon nakuha sang Bombo Radyo Roxas, isa ka kilala nga negosyante sa Capiz ang nagapang-imbitar sa sin-o man nga interesado nga magtambong sa weekly outreach KAPA orientation.
Patigayunon ang oryentasyon sa isa ka barangay sa syudad sang Roxas alas 8 subong nga aga, Hunyo 9, 2019.
Tuyo sang oryentasyon nga mapalapnag ang maayo nga matuga sang KAPA sa kabuhi sang tawo.
Ba-se sa ginpanagtag nga imbitasyon, ini na ang solusyon nga ginahulat sang tanan para mangin madasig ang pag-umwad sang pangabuhi sang tawo.
Sa karon nakaalerto na ang PNP matapos nagpaguwa sang memorandum sa ila nga bahin nga istrikto nga i-monitor ang posible pagsulod sang KAPA sa ila nga lugar.
Nauna diri, ginmandu na ni President Rodrigo Duterte sa National Bureau of Investigation (NBI) kag PNP-CIDG nga ipasarado na ang operasyon sang KAPA Community Ministry International Inc. ukon Kabus Padatoon ni Pastor Joel Apolinario.
