ROXAS CITY – Mas nagalala pa ang krisis nga na-ekperensyahan sang pungsod Sri Lanka bangud sa kakulangan sang suplay sang produktong petrolyo kag pagtaas sang balaklon.
Ini ang ginkumpirmar ni Bombo International Correspondent Zeny Verdillo Gadut, OFW adviser nga nakaba-se sa Sri Lanka sang mainterview sang Bombo Radyo.
Suno kay Gadut, ‘bankrupt’ na ukon wala na sang pondo ang gobyerno para makabayad sa gina-import nga produktong petrolyo sa ila nga pungsod apang masuwerte man ini sa gihapon bangud may mga pungsod pa nga nagapautang sa gobyerno.
Bangud sa kakulangan sa suplay sang gatong, pila sa mga residente ang nagapanglakaton na lamang padulong sa ila trabaho ukon mag-usar sang bisikleta bangud wala naman sang transportasyon.
May yara man sang bus nga programa ang gobyerno apang nagagulutok ang mga pasahero.
Apisar yara sa idalum sang krisis padayon suno diri ang trabaho sang mga OFW’s kag tumalagsahon na lamang nagguwa sa ila ginatiniran bangud sa pagtaas sang mga nagapanguna nga balaklon sa merkado.
Dugang pa ni Gadut nga problema man nila ang padayon nga pagtaas snag mga produkto apang wala nagataas ang sweldo sang mga trabahante.
Apisar bastante pa ang suplay sang pagkaon, may yara na sang nagapanic buying ilabi na sa bugas, harina kag asukar.
Samtang, 14 ang napagkit nga nagkalamatay bangud sa pinilahay sa petrolyo kun sa diin nagadugay sa 2-4 ka adlaw ang pila makakuha lamang sang gatong.
Pila naman sa mga OFW ang nagpalista para sa repatriation agud makapauli sa pungsod Pilipinas.
