Isa ka kuring sa New Zealand nga may pangalan nga Leo ang ginbansagan nga “Leonardo da Pinchy” matapos matukiban ang iya tumalagsahon nga kinaiya kasubong sang pagpangawat sang mga panapton, ilabi na sang underwear halin sa mga hinalay sang iya nga mga tupad balay.
Suno sa tag-iya sang kuring nga si Helen North, ang iya 14 ka bulan nga hinuptanan nakapauli na sang mas ukon menos 150 ka mga panapton sa nakaligad nga siyam ka bulan.
Kalakip sa mga paborito nga kawaton ni Leo amo ang mga underwear kag medyas.
Apang wala man ini nagapili bangud nakapauli man si Leo sang mga gardening gloves, sports bra, kalo, kag mangin sang mga malahalon nga jersey nga may price tag pa.
Suno kay North, pinakaaktibo si Leo kada semana, kun madamo sang hinalay nga mga bayo sa ila nga neighborhood.
Dugang pa sini kun napauli sang kuring ang mga gamit, ginabayaan niya lang ini sa salog kag mahalin nga kaangay nga wala sang natabo.
Agud mabalik ang mga gamit, nagagamit si North sang isa ka lokal nga WhatsApp group kag mga Facebook group nga ang mga miyembro amo ang ila mga tupad balay.
Diri niya gina-post ang mga laragway sang mga butang nga napauli sang iya alaga nga si Leo agud makuha sang mga matuod nga nagapanag-iya.
Dugang pa sang natungdan, pinakadaku nga butang nga napauli ni Leo amo ang isa ka stuffed toy nga man-og nga may kahabaon nga lima ka tapak.
