PRESIDENT ROXAS, CAPIZ – Nakumpiskar sang mga otoridad ang isa ka unit sang L300 van nga may karga nga mga iligal nga kahoy sa Brgy. Bayuyan, Pres. Roxas.
Ang salakyan ginamaneho ni Alyas “Nognog” kaupod sang iya helper nga si alyas “Claro”.
Narekober sa sulod sang van ang kabug-usan nga 39 ka bilog nga mga kahoy nga ginakalakipan sang apat (4) ka Salong, tatlo (3) ka Gmelina, 28 ka Bakan, duha (2) ka Mahogany, kag duha (2) ka Taluto, nga may kabug-usan nga volume nga 508 board feet kag ginabulubanta nagabalor sang Php 20,320.00.
Nangin madinalag-on ang operasyon pinaagi sa pagbuligay sang Capiz Provincial Police Office – 2nd Platoon Mobile Force Company kag sang PENRO Capiz Monitoring and Enforcement Section (MES) personnel.
Suno sa report, na-intercept ang van samtang ginasubay sini ang dalan halin sa Brgy. Yating, Pilar padulong sa banwa sang President Roxas.
Sandig sa ginpatigayon nga beripikasyon, napaslawan ang driver nga magpakita sang mga kinahanglanon nga dokumento ukon permit para sa pagbiyahe sang mga forest product.
Bangud sini, nagapangatubang ang mga nadakpan sang kaso nga paglapas sa Section 77 sang Presidential Decree No. 705, ukon ang Revised Forestry Code of the Philippines, nga may kaangtanan sa illegal logging kag iligal nga pag-transport sang mga forest product.
Ang mga nakumpiskar nga kahoy kag ang salakyan ang yara na sa paghinakop sang PENRO Capiz para sa nagakaigo nga disposisyon.
– Reported by: Bombo Francis Biñas
