Padayon nga nagalaum si Senador Ping Lacson nga respetuhon sang mga senador ang pinal nga desisyon sang Korte Suprema angut sa motion for reconsideration sang Kamara angut sa impeachment complaint batok kay Vice President Sara Duterte.
Ginhatagan punto ni Lacson nga kalabanan sa iya mga kaupod nga nagboto pabor sa pag-archive sang impeachment complaint mismo ang nagsiling nga dapat tahuron ang desisyon sang Korte Suprema.
Gin-athag sini nga amo ini ang rason kon ngaa nag-abstain siya sa pagboto—bangod ang iya panindugan amo ang pagtahod kag indi paglapas sa Hulyo 25 nga desisyon sang Korte Suprema.
Indi man niya luyag nga i-preempt ang pinal nga desisyon, ilabi na nga may pending nga motion for reconsideration.
Dugang pa sang senador nga kun nagboto siya sadto, mahimo kuntani nga ma-preempt ang final ruling sang Korte Suprema.
Suno sa iya, ginmanduan pa sang Korte Suprema ang kampo ni Duterte nga maghatag sang komento sa motion for reconsideration, sa baylo nga gilayon magpaguwa sang minute resolution nga nagabasura sini.
Ginpanindugan ni Lacson nga mas maayo kuntani kun wala gin-aksyonan sang Senado ang una nga desisyon sang Korte Suprema, bisan pa nga gilayon ini nga executory, ilabi na nga may pending motion for reconsideration.
Sa subong, masiling nga “patay na” ang reklamo sa impeachment, pero mahimo pa ini nga mabuhi liwat bangud mahimo pa ini nga i-release sa archives—butang nga magadul-ong sa bag-o nga debate kag pagboto.
