TAPAZ, CAPIZ- Arestado ang isa ka lalaki matapos ang ginpatigayon nga drug buybust operation sang mga otoridad sa Barangay Carida, Tapaz, Capiz.
Ang arestado amo si alyas ‘Jay-Jay’, 25-anyos kag residente sang Barangay Agcococ sa amo nga banwa.
Sa impormasyon nga nakuha sang Bombo Radyo nagikan sa Tapaz Municipal Police Station, ginpahayag nga nadakpan ang amo nga lalaki pamaagi sa isa ka pulis nga nagpakuno-kuno poseur-buyer.
Nakuha sa paghinakop sini ang P100 nga buybust money, P1500 counterfeited buybust money, apat ka heat sealed transparent plastic sachet nga may sulod sang ginapatihan shabu, isa ka cigarette foil, isa ka coin purse nga nagaduag itom, kag isa ka unit sang motorsiklo.
Samtang, ginabulubanta may kabug-aton nga 15 gramos ang ginapatihan shabu nga may standard dug price nga P102,000.
Nagapangatubang ini sa karon sa kaso sa paglapas sa Republic Act 9165 ukon ang “Comprehensive Dangerous Drugs Act of 2002.”
Sa karon, yara na kustodiya sang Capiz Provincial Forensic Unit ang arestado kaupod sang mga nagkalakumpiskar sini sa iya para sa nagakaigo nga disposisyon.
