Dakop ang isa ka lalaki matapos nakuhaan sang armas-luthang sa ginpatigayon nga search warrant sang katapo sang mga kapulisan sa Dumarao MPS sa barangay Aglalana, Dumarao, Capiz.
Ginkilala ang arestado kay alyas “Boy”, 28-anyos, kag residente sang nasambit nga lugar.
Sa pagpakig-angut sang Bombo Radyo kay PLT. Russel Husmalaga, Deputy Chief of Police sang Dumarao MPS, ginpahayag nga ang amu nga persona ang madugay na nga nagapinalupok sang armas-luthang sa ila nga lugar, suno sa informant.
Mahibaluan nga nakuha sa paghinakop sang nadakpan ang isa ka unit sang Homemade 12 gauge pistolized shot gun (break type) nga may karga nga isa ka live ammunition.
Samtang, natalana naman nga pagapasakaan sang kaso ang nasambit nga lalaki nga paglapas sa RA 10591 ukon “Comprehensive Firearms and Ammunition Regulation Act”.
Sa karon, nagapabilin sa karsel sang Dumarao MPS ang amo nga akusado sa para sa nagakaigo nga disposisyon.
