Ginaalegar ginpulihan kastigo sang apat ka mga persona ang isa ka lalaki kadungan sang pagsug-alaw sang bag-ong tuig sa Sitio Tingas, Barangay Balucuan, Dao, Capiz.
Ginkilala ang biktima kay alyas “Jay”, 33 anyos, samtang ang mga ginapahayag suspek ang ginkilala nanday alyas “Hansel”, alyas “Bernard”, alyas “Julius” kag alyas “Juliano” lunsay yara sa legal nga pang edaron kag lunsay mga residente sang nasambit nga lugar.
Sa interview sang Bombo Radyo kay PSMS. Ruben Francisco- Imbestigador sang Dao Municipal Police Station, ginpahayag nga samtang nagapanglakaton ang biktima upod sang iya nga hinablos agud nga kadtuan ang iya sini nga utod sa ila nga balay, nalabayan sini ang mga ginapahayag suspek nga naga inom-inom kag gintamyaw niya pa ini sang ‘Happy New Year’.
Pahayag pa nga ginhakos pa sang biktima si alyas “Juliano” kag nagderetso na sa balay sang iya utod.
Apang, nagbalik man ini gilayon bangud ginsugata nalang sang iya nga bayaw kag ginhambal nga sa ila tiyo ini magaselebrar sang bag-ong tuig.
Sa ila nga pagbalik, hinali nalang ini nga ginlampusan sang botelya ni alyas “Bernard” ang biktima sa ulo kag didto na nga ginpulihan kastigo sang tatlo pa sini ka mga kaupdanan.
Dugang pa ni Francisco, nga nag angkon sang pilas sa ulo ang biktima nga gilayon naman nga ginpadangat sa ospital para sa nagakaigo nga pagbulong kag sa karon yara na sa estable nga kondisyon.
Sa karon, padayon pa nga ginalalip sang mga kapulisan ang mga suspetsado matapos ini nga nakapalagyo sang makumiter ang krimen samtang ginahulat nalang sang mga kapulisan ang mga dokumento para sa pag file sang kaso.
