PILAR, CAPIZ – Patay ang isa ka tripulante matapos nga malumos sa baybayon nga sakop sang Barangay Casanayan, Pilar, Capiz.
Ginkilala ang biktima kay Ricarido Montalban Jr., 50-anyos kag residente sang nasambit nga lugar.
Sa interview sang Bombo Radyo kay PSSG Annie Lou Patricio, Imbestigador sang Pilar MPS, ginpahayag nga una nga nasapwan ang biktima nga nagalutaw-lutaw sa amo nga baybayon sang iya sini nga pakaisa.
Dugang pa, ginguyod suno ini sang iya pakaisa sa higad.
Gilayon naman ini nga ginpadulungan sang mga katapo sang Pilar MDRRMO kag gindala sa Bailan District Hospital, apang gindeklarar nga dead on arrival sang nag-atendir nga doctor.
Nahibaluan, yara sa impluwensya sang makahulubog nga ilimnon ang biktima.
Sa karon, padayon pa ang imbestigasyon sang mga katapo sang Pilar MPS angut sa nagluntad nga insidente.
