Nagahigdaon kag duguon na sang nasapwan ang isa ka lalaki sa may bahin sang circumferential road sa barangay Dayao Roxas City.
Ang amo nga bangkay ang wala pa sa karon makilan-an.
Sa inisyal nga impormasyon nga nakuha sang Bombo Radyo nagikan sa lugar, nakit-an ini sang isa ka tricycle driver nga naglabay sa amo nga lugar nga nagahigdaon na kag duguon ang amo nga persona kag gilayon naman nga nagpangayo sang bulig ang nasambit nga nakakita. .
Ginpahayag nga ini ang nahamtang sa tunga mismo sang karsada sa nasambit nga lugar.
Mahibaluan nga nag-angkon sang pilas sa ulo kag likod ang nasambit nga biktima tuga sang pagpangluthang.
Madasig naman ini nga ginrespondihan sang mga katapo sang Roxas City Emergency Response Team kag gilayon nga ginpadangat sa ospital.
Dugang pa nga nakit-an sa lugar nga ginluntaran sang insidente ang duha ka empty shell sang ginapatihan 45 nga sahi sang armas-luthang.
Sa karon, nagapadayon pa ang ginapatigayon nga imbestigasyon sang kapulisan angut sa nasambit nga insidente.
