ROXAS CITY – Nagapabilin sa kustodiya sang Pontevedra Municipal Police Station, ang lalaki nga nadakpan nga magakuha lang kun tani sang National Police Clearance matapos matukiban nga may yara ini sang ginapangatubang nga kaso.
Sa interview sang Bombo Radyo kay Police Captain Gregg Anthony Salbang, Hepe sang Pontevedra Municipal Police Station, ginpahayag sini nga nagpadulong sa ila talatapan si alyas Jessie, 55-anyos kag residente sang Brgy. Tuburan, Maayon, Capiz agud kun tani magkuha sang National Police Clearance.
Suno kay Salbang, samtang ginaproseso ang amu nga dokumento naguha sa record sini nga may yara sang ginapangatubang nga kaso nga ARSON kag FRUSTRATED MURDER sa probinsya sang Sorsogon sa rehiyon 5 si alyas Jessie.
Mahibaluan nga ang warrant of arrest ang gin-isyu kag ginpirmahan ni Excutive Judge Bernardo Rivera Jimenez, sang RTC, 5th Judicial Region, Branch 54, Gubat, Sorsogon, nga napetsahan sadtong Pebrero 23, 2024.
Ginrekomendar sang korte ang piyansa nga P200,000 para sa kaso nga frustrated murder, samtang wala naman sang piyansa nga ginrekomendar ang korte para sa kaso nga arson para sa temporaryosini nga kahilwayan.
Matandaan una na nga nagsungka sa Maayon Municipal Police Station si alyas Jessie kun sa diin ginapahayag nga supporter sang Communist Terrorist Group (CTG).
