ROXAS CITY – Nakabaton sang pagpamahog sa kabuhi ukon death threat ang lalaki nga ginluthang-patay sa Cadimahan Bridge, Barangay Baybay, Roxas City bangud sa utang nga tubtob sa karon wala pa nabayaran.
Ini ang ginpahayag ni PCMS Ramil Arcangeles, Public Information Officer sang Roxas City PNP sang mainterview sang Bombo Radyo.
Suno diri, nagaguwa sa imbestigasyon sang kapulisan kag isa sa anggulo nga ginatan-aw sa pagpatay amu ang utang, pinaagi sa narekober nga cellphone nga ginapanag-iyahan sang biktima nga si Aldrin ‘Jboy’ Rico.
Pahayag ni Arcangeles, nakit-an sa cellphone ang pila ka mga conversation sa diin kalakip na diri ang death threat.
Sa pihak sini, ginapadalman pa sang mga kapulisan ang imbestigasyon angut sa insidente ilabi na sa mga ebidensya nga ila nakuha sa crime scene kag mga statement sang pila ka mga testigo.
Matandaan, nga ginbawian sang kabuhi si Rico samtang ginabulong sa ospital bangud sa na-angkon sini nga igo sang bala sa nagkalain-lain nga parte sang lawas.
Samtang, ginpaidalum naman sa post mortem examination ang bangkay ni Rico.
Mahibaluan nga pagbaligya sang balloon nga pangabuy-anan sang biktima.
