PUNTA TABUC, ROXAS CITY – Wala nakasalbar sa kamatayon ang isa ka lalaki, matapos ginpa-arakan luthang sang ginapahayag riding in tandem sa Hermano Subd. Brgy Punta Tabuc, Roxas City.
Mahibaluan nga ginkilala ang biktima kay Kashmer Bacarro Trumpeta, 32-anyos, residente sang Barangay Malocloc Sur, Ivisan, Capiz apang temporaryo nga nagapuyo sa Hermano Subd. Brgy Punta Tabuc, Roxas City., samtang ang mga suspek wala pa makilan-an.
Sa impormasyon nga nakuha sang Bombo Radyo nagikan sa Roxas City PNP, ginapahayag nga samtang ang biktima yara sa ila puluy-an nagpanawag ang isa sa mga suspek kag sang ginbuksan sini ang gate hinali na lamang nga ginluthang ang biktima kun sa diin naigo ini sa wala nga bahin sang iya ulo kag dughan.
Gilayon naman nga ginpadangat sa isa ka pribado nga ospital para sa nagakaigo nga pagbulong apang gindeklarar ini nga dead on arrival sang doctor.
Narekober sa lugar ang 7 tanan ka basiyo sang .45 caliber nga armas luthang.
Sa karun, padayon pa nga gina-ayam sang kapulisan ang mga suspek kag padayon ang imbestigasyon angut sa nagluntad nga insidente.
