Padayon nga ginabulong sa ospital ang isa ka persona nga biktima sang pagpangkastigo sang wala makilan-an nga mga persona sa Barangay Culasi syudad sang Roxas.
Ang wala na ginhingadlan nga biktima ang bag-ohanon nga naga-istar sa nasambit nga lugar.
Sa interview sang Bombo Radyo kay Mary Jane Almalbis, Barangay Kagawad sang amo nga barangay ginpahayag sini nga may nagreport sa ila nga isa ka nagatrabaho sa dako nga kalan-an sa amo nga barangay nga may nagpangayo sa ila sang bulig nga ginkastigo.
Gilayon nga ginpadulungan sang Barangay Kagawad nga malapit sa lugar kag didto nakit-an ang amo nga biktima nga may samad sa ulo, mga bagras sa itsura kag nabudlayan magtindog kag maglakat bangud sa pagpangkastigo.
Madasig naman ini nga ginrespondihan sang Barangay Officials, gindala sa pinakamalapit nga ospital para sa nagakaigo nga pagbulong.
Suno pa kay Almalbis, nga wala sang malain nga record sa barangay ang biktima kag first time ini nahitabo sa iya.
Sa karon, padayon pa nga ginahibalo ang yara sa likod sang pagpangkastigo sa amo nga biktima.
