DINGINAN, ROXAS CITY – Malimpyo ang record sa barangay sang lalaki nga gintiro sa Barangay Dinginan, Roxas City bangud sang pagpangsita sang magahod nga tambutso.
Ang biktima amo si alyas “Roxan”, yara sa legal nga pang-edaron kag ang suspek amo si alyas “Michael”.
Sa interview sang Bombo Radyo kay Barangay Teodoro Bonite, iya ginpahayag nga base sa iya pagpangusisa, samtang nagapamahaw ang biktima kaupod ang iya asawa, gulpi lang nga nag-abot ang suspek sakay sang motorsiklo kag gintiro ang biktima gamit ang caliber 45 nga armas-luthang kag naigo sa dughan .
Suno kay Kagawad Bonite, gilayon nga gindala sa ospital ang biktima kag gindapatan sang pagbulong.
Pahayag pa niya, gab-i pa lang may yara na sang nagluntad nga hiligut-anon sa tunga sang biktima kag suspek kabangdanan nga ginbalikan ini kag gintiro.
Dugang pa sang natungdan, padayon ang imbestigasyon sang kapulisan agud nga madakpan ang nasambit nga suspek kag mapasakaan sang nagakaigo nga panumbungon.
