ROXAS CITY – Nagapabilin nga missing ang isa ka lalaki nga mapauli kuntani sa banwa sang Maayon gikan sa Manila sang Hunyo 26, apang tubtob subong wala pa ini nakaabot.
Ginkilala ang nangindulaan nga lalaki kay GLIEN ARGUILLON, isa ka chocolate factory employee sa Manila kag residente sang Barangay Quinabonglan, Maayon, Capiz.
Sa pagpakig-angut sang Bombo Radyo sa utod sini nga si Jona Arguillon, ginsiling sin inga padayon ang ila pagpangita sa iya utod.
Ginpahayag sini nga ulihi niya nga nakontak ang iya utod sang yara ini sa bahin sang Calapan, Mindoro kag suno diri ginsiling ni Glein nga kutob na lang siya sa Caticlan Port bangud indi na ini luyag magsakay sa Roro Bus nga ginsakyan gikan sa Manila bangud ginpahayag may nagapamahog sa iya nga pagatirohon siya.
Wala man gintuad sang soltero kun sin-o ang gapamahog apang ginhambalan siya ni Jona nga indi magpakulba bangud indi ini matabo.
Apang sa nerbyos, wala ini nagsakay sa Roro bus kun sa diin ginbilin niya ang iya gamit kag gintugyan sa driver nga idul-ong sa iya pamilya sa bahin sang crossing Texas kag nagsiling nga masakay na lang sa van padulong Kalibo, nagpamangkot pa ini sa isa ka guwardiya kun sa diin ang police station bangud luyag sini ireport ang nagapamahog sa iya kabuhi.
Suno kay Jona, ginatsekyar niya ang iya utod pinaagi sa pagtawag kag ang ulihi sini nga ginhambal nga indi na siya pag-ikontak bangud manugsakay na siya sa isa ka van padulong sa Kalibo kag kutob didto na lang ang ila paghinun-anon kag wala na liwat na kontak pa si Glein.
Dugang pa sin inga nabaton na sang iya pamilya sa Maayon ang gamit sang iya utod nga nabilin sa Roro Bus.
Mahibaluan nga first time ini nga magbiyahe ni Glein Arguillon papuli sa probinsya bangud madugay na ini nga nagatrabaho sa Manila kaupod ang iya utod nga amu mismo ang nagdul-ong sa iya sa terminal.
Nakig-angut naman ang pamilya Arguillon sa katapo sang Kalibo PNP kag pagatawgan sila suno diri kun may update sila.
Panawagan sang iya pamilya, nga kun sin-o man ang nakakita sa iya gilayon nga makig-angut sa ila.
