DUMARAO CAPIZ – Anay na nga napreso sa kaso nga robbery, ang lalaki nga nadakpan matapos makuhaan sang indi lisensyado nga armas-luthang sa Sitio Tacay, Barangay Astorga, Dumarao, Capiz.
Matandaan nga ang wala na ginhingadlan nga persona ang residente man sa nasambit nga lugar.
Sa interview sang Bombo Radyo sa hepe sang Dumarao Municipal Police Station nga si PCapt. Tobias Garfin, ginpahayag sini nga natigayon nga madakpan ang arestado pinaagi sa gintingub nga pwersa sang 2nd Mobile Force Company kag Dumarao MPS.
Mahibaluan, nga nakuha sa paghinakop sand nadakpan ang isa (1) ka loaded nga homemade 12-gauge pistolized shotgun nga may anum ka live ammunition kag one fragmentation hand grenade.
Dugang pa nga nakuha ang 14 ka sachet sang ginapatihan nga shabu.
Magapangatubang ang suspek sang kaso nga paglapas sa R.A 10591 ukon “Comprehensive Law on Firearms and Ammunitions Regulation Act” kag R.A. 9165 ukon “Comprehensive Dangerous Drugs Act of 2002”.
Sa karon yara na sa kustodiya sang Dumarao PNP ang suspek para sa nagakaigo nga disposisyon.
