ROXAS CITY – Nagapati ang pamilya sang lalaki nga nalumos matapos nga ginaalegar naglumpat sa isa ka suba sa Sitio Pagutok, Barangay Dayao Roxas City nga wala sang foul play sa kamatayon sang ila himata.
Matandaan nga ginkilala ang biktima nga si Alberto Pasandan 44-anyos, soltero kag residente sang Barangay Punta Tabuc, sini nga syudad.
Sa interview sang Bombo Radyo kay Roland, hinablos sang biktima, posible suno diri gin-atake ang iya tiyo sang iya sakit sa diin naga-hallucinate ini nga may nagalagas sa iya nga indi makilal-an nga tawo.
Pahayag sini, makapila na ka beses natabo ang kaangay nga insidente sa diin katapusan sini nga atake, nagsaka sa puno sang kahoy ang iya tiyo agud makapalagyo sa ginaalegar nagalagas sa iya.
Nahibaluan man nga antes natabo ang insidente, nakit-an pa sini si Alberto nga naga-inom sang makahulubog nga ilimnon.
Matandaan, Marso 7 ginapahayag nakit-an sang manugbantay sang punong si Alberto nga naga-isahanon kag ginaalegar naglumpat sa suba.
Gintinguhaan pa ini nga masalbar apang wala na ini sang kabuhi sang nasapwan sang Marso 8 sa Sitio Cablatan, Barangay Cagay.
