MAAYON CAPIZ – Nakilala na ang lalaki nga nasapwan nga nagahigda kag duguon sa Sitio Agbanga, Brgy. Indayagan, Maayon, Capiz sadtong tinalikdan nga gab-i.
Mahibaluan nga ginkilala ang biktima kay Rolando Villanueva, alyas “bangag” yara sa legal nga pang-edaron, helper sang poultry sa banwa sang Panitan kag residente sang Pob. Tacas, Pontevedra, Capiz.
Matandaan nga sang natabo ang insidente nakit-an na lamang ang nanday Jemar Desano, 24-anyos kag residente sang Brgy. Ilawod kag Waren Degoma, 26-anyos residente sang Brgy. Indayagan sa amu nga banwa ang biktima nga nagahigda sa dalan kag duguon ang biktima.
Base naman kay Rolindo Dilao samtang yara ini sa iya puluy-an may nabatian ini nga lupok sang armas-luthang 60metros ang kalayuon.
Sa iya pagtsekyar sa lugar, nakit-an sini niya ang 2 ka mga persona sakay ang motorsiklo kag madasig nga nagpadalagan padulong sa Barangay Quinat-uyan samtang ang biktima nagahigda na kag wala na sang kabuhi.
Nag-angkon sang patal nga pilas sa ulo ang biktima tuga sang pagpangluthang kabangdanan sang iya gulpi nga kamatayon.
Sa karon, padayon pa nga gina-ayam sang Maayon MPS ang suspek angut sa insidente kag agud matumod kun anu ang motibo sang pagpangluthang.
Samtang may yara na nga ginalantaw person of interest ang kapulisan angut sa nagluntad nga insidente.
