ROXAS CITY-Arestado ang isa ka lalaki matapos nga ginaalegar nagtuyo magpalusot sang peke nga voucher sang isa ka double your money investment sa Barangay Cagay, Roxas City.
Nagreklamo sa Roxas City Police Station ang pila ka staff sang isa Double Your Money investment sa nasambit nga barangay matapos nga nadiskubrehan nga peke ang pay-out vouchers nga tuyo ipalusot sang suspek.
Ginkilala ang suspek nga si John Paul Alianza residente sang Barangay Tanza Gua, sining siyudad.
Mahibaluan nga apat ka mga pay-out voucher checks nga ginaalegar nga peke ang narekober sa nasambit nga suspek.
Ang nasambit nga voucher check ang nakapangalan kay Cristan Acer nga may yara sang pay-out amount nga P700,000, Jose Lara nga may yara sang pay-out amount nga P710,000, Omar Amorsolo nga may yara sang pay-out amount nga P230,000 kag Rudy Bigcas nga may yara sang pay-out amount nga P360,000.
Ginabulubanta sa kapin P2 milyon nga balor sang voucher ang tuyo nga ipuslit sang suspek.
Sa interview sang Bombo Radyo kay Alianza, hugot sini nga gindepensahan nga nga ginsugo gid lamang ini nga I pay-out ang amo nga mga voucher check.//
Suno sa suspek nga ginsugo ini ni certain alyas toto nga i-pay out ang apat ka voucher checks kabaylo sang P10,000 nga suhol ka da voucher.//
Gindugang pa sini nga wala ini sang ideya nga peke ang amo nga mga vouchers
Sa karon nagapabilin sa karsel sang Roxas City Police Station si Alianza.
Samtang desidido naman suno diri nga magpasaka sang nagakaigo nga panombongon ang nasambit nga talatapan.
Mahibaluan nga ang cashier mismo sang talatapan sang amo nga double your money investment ang nakatukib nga peke ang mga vouchers nga dala ni Alianza.
