ROXAS CITY – Patay ang isa ka lalaki matapos ginlampusan sang kaupod nga parking boy matapos nagpamalibad nga magbakal sang ilimnon.
Matandaan nga ginkilala ang biktima kay alyas Noel, 50 anyos residente sang Barangay Tiza sining syudad, samtang ang suspek amo si alyas Roger parking boy sang Roxas Avenue.
Sa interview sang Bombo Radyo kay PSMS Ramil Arcangeles, Public information Officer, sang Roxas Component City Police Station ginpahayag nga kahapon nga adlaw bag-o paman matabo ang insidente, may nagpatunga nga kumosyon sa duha.
Mahibaluan nga ginapilit sang suspek ang biktima nga magbakal sang ilimnon apang wala na ini sang kwarta.
Suno pa kay Arcangeles ginreport sang concern citizen nga amo ang nakakita sang insidente matapos ang ila pagkinagamo sang suspek, ginkastigo sining suspek ang amo nga biktima kag ginlampusan ini rason sa iya naangkon nga pilas sa ulo.
Gilayon man ini ginpadulungan ang lugar sang katapo sang Roxas City Emergency Response Team matapos nakabaton sang report kag gilayon nga gindala sa ospital ang biktima apang ginbawian sang kabuhi samtang gintatap sa ospital.
Nag-angkon sang pilas sa ulo ang biktima nga nangin kabangdanan sang iya kamatayon.
Samtang, naaresto naman ang suspek matapos ginturn-over sang mga residente nga nakakita sa iya ginhimo nga pagpangbakbak sa biktima.
Sa karon, nagapabilin si alyas Roger sa kustodiya sang Roxas City Police Station kag natalana nga pasakaan sang nagakaigo nga kaso.
