PONTEVEDRA, CAPIZ- Patay ang isa ka lalaki matapos ang nagluntad nga pagbungguanay sang tricycle kag topdown sa Barangay Jolongajog, Pontevedra, Capiz.
Ang biktima amo si alyas “Biboy”, 23-anyos, driver sang topdown kag residente sang Sitio Santa Ana, Brgy. Binuntucan, Pontevedra Capiz, samtang ang driver sang tricycle amo si alyas “Nonoy”, 17-anyos kag residente sang Brgy. Cogon, Panay, Capiz kaupod ang tatlo sini ka mga sakay nga lunsay man mga menor de edad.
Sa interview sang Bombo Radyo kay Police Captain Dennis Losbañes, Officer In Charge sang Pontevedra Municipal Police Station, iya ginpahayag nga samtang ginasubay ni alyas “Nonoy” ang dalanon upod ang iya nga mga sakay halin sa Barangay Lantangan kag padulong kuntani sa Barangay Ilaya sang amo nga banwa, hinali nalang nga nagliso padulong sa ila nga direksyon ang ila kasugata nga topdown nga ginamaneho ni alyas “Biboy”.
Bangud sang natabo, nag-angkon sang minor nga pilas ang tatlo ka mga sakay sang tricycle sa diin nga ginpandangat ini sang mga katapo sang Pontevedra Emergency Response Team sa Roxas Memorial Provincial Hospital, Roxas City para sa nagakaigo nga pagbulong.
Samtang ang driver sang topdwon nga si alyas “Biboy”, nag-angkon man sang mga pilas sa nagkalain-lain nga bahin sang iya nga lawas. Ginpadangat pa ini sa Bailan District Hospital, Pontevedra apang gindeklara ini nga ‘dead on arrival’ sang doktor nga nag-atendir.
Maswerte naman nga wala napilasan ang driver kag isa ka sakay sang tricycle.
Sa subong, nagapadayon ang koordinasyon sang magtimbang nga bahin para sa dugang nga mga tikang natuhoy sa nasambit nga insidente.
Interviewed by Bombo Francis Biñas
