Pilason, ang isa ka lalaki matapos ginlabo sang kaugalingon nga tiyo sa Sitio Banta-aw, Barangay Cogon, Panitan, Capiz.
Sa nakuha nga impormasyon sang Bombo Radyo nagikan sa Panitan MPS, ginkilala ang biktima kay alyas Jose, 33-anyos. Samtang, ang ginatudlo nga suspek ang ginkilala kay alyas Elmer, 68-anyos, lunsay mga residente sang nasambit nga lugar.
Ginapahayag nga samtang papuli na kun tani sa ila balay ang biktima sang gintambangan ini sang iya tiyo kag ginpasibangdan nga nagpang-utod sang tanum sini nga saging.
Bangud sini, may nagluntad nga mainit nga pagbinaisay sa tunga sang biktima kag suspek, rason nga hinali nalang nga ginlabo sang suspek ang biktima gamit ang isa ka garab.
Pilas sa tiyan ang naangkon sang biktima, samtang napilasan man sa kamot ang suspek kag lunsay nga ginpadangat sa magkatuhay nga ospital.
Nahibaluan, nga yara ang suspek sa idalum sa impluwensya sang makahulubog nga ilimnon ang tiyo sang natabo ang insidente.
Sa karon, padayon pa nga gina-imbestigaran sang mga katapo sang Panitan MPS ang nasambit nga insidente.
