ROXAS CITY -Tuman nga kakulba ang nabatyagan sang 23-anyos nga lalaki matapos ginaalegar gintambangan kag ginhandus sang kutsilyo sang anum ka mga kalalakinhan sa Barangay Cabugao Roxas City.
Suno sa inisyal nga interview sang Bombo Radyo sa biktima nga si Johny Soberano residente sang Barangay San Jose sining siyudad ginaalegar sini nga samtang ginasubay sini ang dalanon sakay sa iya motorsiklo, may yara sang anom ka wala matumod nga mga persona nga nagtambang sa iya.
Suno kay Soberano nga nagpangayo sang kwarta ang mga suspek para pambakal sang ila ilimnon.
Apang sang nagpamalibad ini nga wala sang kwarta, hinali na lamang ini nga gindumog kag ginhandus sang kutsilyo sang isa sa mga suspetsado.
Natigayon nga makapalagyo si Soberano kag madasig nga nagpangayo sang bulig.
Samtang, nag-angkon naman sang menor nga pilas sa nawala nga kilid sang lawas si Soberano tuga sang pagpanghandus sa iya.
Sa karun nagapadayon ang imbestigasyon sang mga kapulisan agud matumod ang mga suspetsado.
