SIGMA, CAPIZ- Ginhatagan sang klaripikasyon sang Land Transportation Office sa banwa ang isyu nga may kaangtanan sa ginpalab-ot nga reklamo sang mga motorista hanungod sa Speed Limit Ordinance nga ginpatuman sa banwa sang Sigma, probinsya sang Capiz.
Sa interview sang Bombo Radyo kay Ms. Riza Otayde, District Chief sang Land Transportation Office (LTO) Dumalag, ginpahayag nga ang mga reklamo naglab-ot sa ila opisina sa diin nga amo man ang nangin rason kag sentro sang ginpatigayon nga Committee Hearing sang mga natungdan nga ahensya, upod ang Regional Director sang Land Transportation Office (LTO) Region VI nga si Atty. Gaudioso Geduspan II.
Dugang pa sini, sa bahin sang ila nga talatapan ang road safety ang top priority kag adbokasiya sa diin ginadakop nila ang mga nagabayolar sang mga patakaran sa dalanon.
Sa nasambit hearing, ginpatpat ang Joint Memorandum Circular 2018-001 nga amo ang nagserbe nga pundasyon sang nasambit nga Speed Limit Ordinance sa banwa sang Sigma.
Kaupod ang Department of Transportation (DOTr), Department of Public Works and Highways (DPWH), kag Department of Interior and Local Government (DILG) sa pagpanguna sang Committee on Transportation and Communication kag Committee on Local Government, ginhinlaan ang nasambit nga isyu sa diin ginpahayag sang ni Atty. Geduspan nga wala naman suno sa iya sang problema nga nakita ang ila nga talatapan magluwas signage nga kinahanglan nga padakuan agud nga mangin mas visible ini sa mga motorista. Subong man, nagpalab-ot man sang pgkabalaka sa road classification ang tiglawas sang DPWH sa diin suno sa iya nga kuntani istudyuhan liwat agud mahatag sa mga motorista ang mas convenient nga pagpatuman sang ordinansa para sa ila.
Dugang pa diri, ginhinlaan man ang may kaangtanan sa ginapahayag pagkumpiskar sang lisensya sa diin nga gin-athag sang talatapan nga wala sang may mahimo nga confisvation apang presentation agud nga makuha ang impormasyon sang pagkakilala nga ibutang sa citation ticket nga gina-issue sang mga otoridad sa mga nagbayolar kag gilayon ini nga ibalik, pwera nalang kun ang amo nga nagdakop ang isa ka deputized personnel sang LTO.
Samtang, nagpalab-ot man sang pahayag ang LTO nga ang mga katapo sang LGU Sigma mahimo gid nga magpa-deputized sa diin nga kinahanglan ang alkalde nga magsumiter sang Letter of Request for Deputization padulong sa opisina sang LTO, apang indi tanan nga naga-request ang mahimo nga mahatagan sang kahigayunan bangud nga maagi pa sa assessment.
Mensahe naman ni Otayde sa mga motorista nga maghinay sa pagpadalagan sa dalanon agud malikawan ang disgrasya kag maprotektahan ang tanan nga nagagamit sang karsada kag sundon ang ginapatuman nga ordinansa kay para man ina sa kaayuhan sang tanan.
Interviewed by Bombo Francis Biñas
