DUMARAO, CAPIZ- Nagapanawagan ang Local Government Unit sang Dumarao, Capiz sa talatapan sang Department of Social Welfare and Development sang mga food packs para sa mga pumuluyo nga naapektuhan sang Bagyo Tino.
Sa interview sang Bombo Radyo kay Mayor Mateo Hachuela sang Dumarao, Capiz, iya ginpahayag nga may yara man sang naka-prepositioned nga mga foodpacks ang ila nga talatapan apang indi ini bastante para sa mga pumuluyo.
Suno kay Hachuela, halos tanan sang mga pumuluyo ang sa subong nagakinahanglan sang pagkaon kag halos tanan naapektuhan sang amo nga bagyo rason nga kinahanglan gid sang bulig sang DSWD.
Pahayag nya, apisar nga nakapauli na sa tagsa ka mga panimalay sa subong ang mga evacuees, nagalaum sa gihapon ang mga ini sang dugang nga ayuda nga magahalin sa gobyerno.
Apang, sa gihapon ginahulat pa sang alkalde ang ila ginpangayo nga dugang nga bulig sa Department of Social Welfare and Development (DSWD) kag tion nga mag-abot na ini, gilayon naman nga igapanagtag sa mga pumuluyo.
Samtang, nagpasalamat naman alkalde sa tanan nga mga frontliners sa serbisyo publiko nga ila ginpakigbahin agud masiguro ang seguridad sang tagsa-tagsa sa diin nga nagresulta gid sa kadalag-an.
Interviewed by Bombo Francis Biñas
