Nagapadayon ang koordinasyon nga ginahimo sang local government unit sang Sigma sa mga barangay kag concerned agencies may kaangtanan sa pagpanghanda sa bagyo Basyang kasunod sang pagpaidalom sang probinsya sang Capiz sa Tropical Cyclone Wind Signal No. 1.
Sa interview sang Bombo Radyo kay Sigma Mayor Dante Rizal Eslabon, iya ginpahayag nga nagpatigayon na ini sang pagsinapol kahapon kaupod ang mga katapo sang kada barangay agud mangin alerto sa posible nga pagbaha kag agud man nga masiguro ang madasig nga pag-responde sa tion nga may yara sang kinahanglan nga i-evacuate ang mga pamilya nga yara sa mga flood prone kag landslide prone areas.
Suno kay Eslabon, may yara man sang naka-standby nga food packs sa Municipal Social Welfare and Development Office kag nakahanda naman ang mga rescue teams sa tion nga may magkinahanglan.
Dugang pa sang natungdan, may yara siya liwat nga coordination meeting nga patigayunon subong nga hapon agud liwat nga mahatagan sang instructions ang mga katapo sang Municipal Disaster Risk Reduction and Management Council may kaangtanan sa preparasyon sa mangin epekto sang Bagyo Basyang.
