ROXAS CITY-Handa na ang Philippine Red Cross ukon PRC-Capiz Chapter kag Local Government Unit sang Ivisan, Capiz sa patigayunon nga Dugong Bombo 2020 sa maabot nga Setyembre 20, Domingo.
Ini ang ginpahayag ni Mr. Ketch Armiza, Donor Recruitment Officer sang PRC-Capiz Chapter sang mainterview sang Bombo Radyo.
Suno kay Armiza nga patigayunon ini nga bloodletting activity sa civic center sang Barangay Pob. Sur, Ivisan, Capiz sa bulig man sang mga LGU’s kag Bombo Radyo Philippines ukon ‘Dugong Bombo 2020’.
Bangud diri, nagapanawagan si Armiza sa publiko nga kun mahimo mag-ugyon ang tanan sa nasambit nga aktibidad kag mag donar sang ila hamili nga dugo.
Apisar nga nagapangatubang ang tanan sa COVID-19 Pandemic ginpasiguro sini nga ipatuman sa gihapon ang mga minimum health protocol pinaagi sa pag-obserbar sang social distancing, pagsuksok sang facemask kag faceshied.
Dugang pa sini nga antes magdonar sang dugo ang isa ka indibidwal igapaidalom pa ini sa interview ukon screening sang mga katapo sang PRC agud mahibaluan nga wala ini sang anuman nga balatian.
Ang makuha nga mga dugo sang PRC gikan sa mga successful donors ang sarang nga makabenepisyo sa mga nagakinahanglan ilabi na sa mga pasyente nga nagasuprer sang nagkalain-lain nga mga balatian.
Kadungan sini, nagalaum si Armiza nga madamo sang mga blood donors nga magadonar sang ila hamili nga dugo kun sa diin ginabulubanda sini nga indi magnubo sa 200 ang magapasakop sa nasambit nga aktibidad.
Nagapasalamat naman ang PRC sa Bombo Radyo nga nagaugyon sa ila sa paghiwat sining palaabuton nga bloodletting activity sa banwa sang Ivisan.
Nagpahanumdom naman si Municipal Health Officer Dr. Mignon Andara sa mga blood donors nga wala dapat sang balati-an kag wala sang may ginatumar nga bulong, may bastante nga tulog kag wala naka-inom sang makahulubog nga ilimnon, isa ka adlaw antes ang bloodletting activity.
Ginpahayag ni Andrada nga daku man nga bulig sa isa ka tawo nga magdonar sang ila hamili nga dugot bangud maayo ini sa ikaayong lawas kun sa diin ginaislan ang daan nga dugo sang bag-o nga dugo.
Dugang pa sini nga pagasundon sa gihapon ang triage kag ang minimum health standards sa pagbaton sang blood donors.
Suno pa kay Andrada nga may yara man sila sang igahatag nga ‘gift” para sa mangin successful donors apang wala pa sini ginpat-od kun ano.
Samtang, ang mangin successful donors sa Dugong Bombo 2020 sa Ivisan ang hatagan man sang Bombo Radyo Roxas sang Dugong Bombo Special Edition T-shirt kag mga vitamins.
Mahibaluan nga ang isa ka blood donation ang mahimo makasalbar sang tatlo ka kabuhi sang tawo.
