CUARTERO, CAPIZ – Isa lang ang gina-acknowledge sang talatapan sang Liga ng mga Barangay – Capiz Chapter nga Liga President sa banwa sang Cuartero apisar duha ang nagaakto.
Sa interview sang Bombo Radyo kay Capiz Liga ng mga Barangay President Nico Yap, ginpahayag sini nga si Bitoon Ilawod Punong Barangay Valent Villaflor sa gihapon ang ginakilala sang province nga Presidente sang Liga ng mga Barangay sa Cuartero apisar nga nagpanumpa sang damlag lang kay Mayor Tito Mayo si Poblacion Ilawod Punong Barangay Jojo Mayo.
Suno kay Yap nga ginkatingala man sini nga nagpanumpa na si PB Jojo Mayo nga wala pa sang confirmation nagikan sa Liga National.
Gintuad man sini nga may nabaton sila nga resignation letter nagikan kay Villaflor apang ginapa-correct ini sang national bangud indi original ang mga dokumento.
Bangud sini, wala suno diri ginakonsiderar nga nag-resign si Villaflor kag magapabilin ini nga kilalahon nga presidente sang Liga sa Cuartero tubtob indi matadlong ang resignation letter sini.
Para kay Yap nga may gin-istoryahan ang magtimbang nga bahin apang wala ini gina-tolerate sang Liga ang term sharing kag wala mahimo ang ang provincial level sa desisyon sang national.
Sa karon, ginatugyan nalang sini sa DILG Cuartero ang desisyon kag ginapaabot ang duha nga magkadto sa iya opisina.
