Lima ka mga persona, patay sa nagluntad nga sunog sa isa ka residential building sa Kuwait

Lima ka tawo ang nasapwan nga patay sang mga bombero sa isa ka residential building sa Rigga, Kuwait, matapos ginlamon sang kalayo ang ila mga puluy-an.

Suno kay Brigadier General Mohammed al-Gharib, spokesperson sang fire brigade, nagluntad ang sunog sa duha ka mga apartment sa nasambit nga lugar.

Tatlo ka bangkay ang nasapwan sa lugar sang insidente, samtang duha pa ang nagtaliwan sa ila mga pilas sa ospital.

Madamo man nga mga tawo ang napilasan, kag nagpaandam si Gharib nga ang kadamuon sang mga napatay mahimo nga magtaas bangod sang ila malala nga pagkapaso.

Sa karon padayon pa ang imbestigasyon agud mahibaluan ang gintunaan sang sunog.