PANAY, CAPIZ – Tawo na lang ang mahimo makalabay sa dalan nga sakop sang Barangay Magubilan, Panay, Capiz matapos naglapad kag naglaba na gid ang litik kag nawasak man ang portion sang river control.
Sa interview sang Bombo Radyo kay Punong Barangay Floramae Castillo, iya ginpahayag nga ginadumilian na ang tanan nga sahi sang salakyan nga maglabay sa dalan nga nawasak kag may litik.
Suno kay Castillo, nag-umpisa ang litik sang pag-igo sang bagyo Ramil kag naglala na gid matapos ang tatlo ka adlaw kag nag-igo pa ang bagyo Tino nga nagwasak sa portion sang river control.
Pahayag sang Punong Barangay, baha man sa gihapon sa ila lugar kag baruto na lang ang mahimo magamit agud makatabok sa diin mabudlay ang sitwasyon subong sang mga residente.
Ginabanta yara sa 70% nga mga residente sang Barangay Magubilan ang isolated.
Dugang pa sang natungdan, tuig 2020 sang natapos tukod ang nasambit nga river control.
Ginakahangaw-an pa subong sang Punong Barangay ang manugsulod naman nga bagyo Uwan sa Pilipinas.
