ROXAS CITY – Ginakalipay sang alkalde sang banwa sang Maayon ang pagdagsa sang madamo nga tawo sa ginbansagan ‘Little Baguio of Capiz’ sa Sitio Silab, Barangay Batabat sang nasambit nga banwa.
Ini ang ginpahayag ni Mayor Raymond Malapajo sang mainterview sang Bombo Radyo.
Aminado si Malapajo nga wala sini ginalauman ang hinali nga pagsikat sang amo nga lugar.
Suno diri nga wala halos sang adlaw nga wala sang tawo nga nagabisita sa nasambit nga lugar.
Bugal man ini suno sa iya sang ila banwa kag plano pa niya nga paayuhon ang amo nga lugar agud mangin isa ka tourist destination sa probinsiya.
Pananglitan mapaumwad pa ang lugar bilang isa ka destinasyon sang mga turista, kampante si Malapajo nga dako man ini nga bulig sa mga residente bangud mahimo ini magtuga sang trabaho.
May ginpahamtang man suno diri nga mga indibidwal nga naga-mentinar sa nasambit nga lugar kag nagapahanumdom sa mga nagabisita nga mangin responsable ilabi na pag-abot sa ila mga basura.
Kag sa karon nga nagapangatubang sa coronavirus disease (COVID-19) pandemic, ginapahanumdom man ang pag-obserbar sang physical distancing kag pagsuksok sang face mask.
