Kasubong nga ginalauman na sang live-in partner sang nasapwan nga bangkay sa isa ka balay sa Barangay Bago, Roxas City nga siya ang pasibangdan sa kamatayon sang 33 anyos nga biktima.
Ini ang ginpahayag ni Jonathan Bilan, ang live-partner sang biktima nga si Maria Luz Piñaroyo sang mainterview sang Bombo Radyo.
Suno kay Bilan nga sa tion nga magguwa na ang resulta sang autopsy examination sa bangkay sang biktima, ginalauman na sini nga siya ang igatum-ok nga yara sa likod sang kamatayon sang biktima apisar nga wala makatilaw sang pagpangsakit ang biktima sa iya.
Panindugan ni Bilan nga gintundaan lamang siya nga nakit-an nga naganilakat ang duha ka tuig nga bata sang biktima kag nagahilibion rason nga iya ini nga ginsugat.
Apang nakibot ini sang nakabaton sang impormasyon nga nasapwan nga wala na sang kabuhi sa sulod sang balay si Piñaroyo.
Aminado naman si Bilan nga wala na sila nagaupod sang biktima bangud masami sila nga nagabaisay apang wala gid niya ini ginasakit.
Suno pa diri nga masami nga nagainom ang biktima kag may ginadala ini nga kaupod sa trabaho sa iya gina-estaran nga balay.
Nagapati si Bilan nga may yara sang foul play ukon may nagpatay sa biktima bangud wala na ini sang pang-idalom nga panapton sang ini ang nasapwan.
Nagapanawagan naman si Bilan sa mga residente sang Barangay Bago kun may nahibaluan sa natabo sa biktima, gilayon nga magpakig-angut sa mga kapulisan agud matumod ang may kahimuan sang krimen.
