ROXAS CITY – May igapatigayon ang LN4 foundation nga “Give Hope, Give Hand” program buwas nga adlaw, Setyembre 22, alas 9:00 sang aga sa plaza sa banwa sang Dao kun sa diin magapanghatag sila sang libre nga prosthetic hand sa mga PWD partikular ang may kasablagan sa kamot.
Ini ang ginpahayag ni Mrs. Grace B. Cabato, Ambassador sang LN4 Foundation sang ma-interview sang Bombo Radyo.
Suno kay Cabato, matigayon ang nasambit nga programa bangud sa dako nga suporta ni Mayor Jimbo Barruela sang Dao.
Mahimo mangin benepisiaryo ang mga tawo nga nagakinahanglan sini ukon ang mga indibidwal nga nadulaan sang kamot kasubong sang mga mangunguma, tricycle driver kag iban pa.
Rekisitos diri nga kinahanglan 10-12 cm below the elbow ang amputation ukon ang antad sang pagkautod sang kamot sa idalom sang siko.
Pananglitan mawasak ang igapanghatag nga prosthetic hand, indi ini pagkay-uhon kundi islan naman sang bag-o.
Kapin 25 ka mga benepisiaryo ang makabaton buwas nga adlaw kag posible magapadayon pa ini sa iban nga kabanwahanan rason man nga ginaganyat ni Cabato ang mga alkalde sa probinsya nga tipunon ang mga pumuluyo nga may kasablagan sa kamot kag makig-angut sa ila agud sila nalang ang magapadulong sa tagsa ka banwa.
Mahibaluan gintukod ang nasambit nga foundation sadtong tuig 2005 kag naglab-ot na sa 70,000 ka persona sa bug-os nga kalibutan ang ila nabuligan kun sa diin 4,000 diri ang nagikan sa Pilipinas.
Ginsiguro ni Cabato nga dekalidad ang ila prosthetic nga igahatag bangud nagikan ini sa pungsod US kag ginabulubanta 10 ka tuig ini magadugay.
Kun indi naman makakadto buwas nga adlaw, mahimo suno diri magkontak sa iya numero: 0921 679 9633 kag mas maayo magpadala sang litrato agud iya makita kun kwalipikado.
Imbitado man ang tanan nga pumuluyo sang Capiz nga luyag magpasakop kag mag-angkon sang bulig.
