Padayon nga ginamonitor sang Local government unit sang banwa sang Panay ang mga unauthorized occupants sa Panay Housing.
Sa interview sang Bombo Radyo kay Panay Mayor Jonathan ‘Sonny’ Besa, iya ginpahayag nga nakibot ini sang mahibaluan ang resulta sang re-evaluation nga ginpatigayon sang National Housing Authority (NHA).
Base sa report, sa 1,500 ka mga naga-istar sa nasambit nga housing project, 471 lamang ang napamatud-an nga residente sang banwa sang Panay kag ang nabilin ang makabig nga mga unauthorized occupants .
Suno kay Besa, bangud sa resulta, liwat nga magatalana ang Local Inter-Agency Committee (LIAC) kaupod ang NHA kag mga otoridad sang re-evaluation agud liwat nga usisaon ang qualification sang mga naga-istar sa housing units.
Nahibaluan nga nagpasar man sang duha ka resolusyon ang LGU-Panay, lakip na ang pag-adopt sang Occupancy Policy sang NHA matapos nga gin-turn over ang nasambit nga proyekto, kag ginbaton sang findings sang una nga re-evaluation nga ginpatigayon sang Enero 21 tubtob 23, 2026.
Ginklaro man ni Mayor Besa nga padayon pa ang mas hugot nga pagtsekyar sang listahan agud matumod ang mga pangalan sang mga illegal occupants.
Dugang pa sang natungdan, magatukod man sang Home Owners Association agud may yara sang magabulig bantay sa pag-atubang sang iban pa nga mga isyu sa nasambit nga housing project.
