Nagbilin sang halit sa probinsya sang Capiz ang mabaskog nga hampak sang mga balud sa baybayon kadungan sang Bagyo Uwan.
Sa interview sang Bombo Radyo kay Mr. Michael Dongon, Information Officer sang Capiz Provincial Disaster Risk Reduction and Management Council, iya ginpahayag nga naka-eksperyensya sang bug-os nga probinsya sang Capiz sang mabaskog nga hampak sang balud.
Suno sa iya, ang mga baybayon sang probinsya ang dako nga ginhalitan sang amo nga bagyo apang magluwas dira, may pila man ka-bahin ang ginhalitan man sang pagbaha.
Pahayag nya, base sa las 5:00 sang aga nga datos sang ila nga talatapan, wala sang may nabalhag nga casualty, apang nagdangat naman sa 24 ka mga panimalay ang partially damaged kag syam ang totally damaged sa banwa sang Ivisan. Mahimo naman nga maagyan sang tanan nga sahi sang mga salakyan ang karsadahon kag mga highways sang probinsya.
Nagpanawagan naman ang natungdan sa publiko nga sa gihapon magpabilin nga aligmat kag tagam agud makalikaw sa kun ano man nga sahi sang insidente ilabi na sa panahon sang kalamidad.
Interviewed by Bombo Jessa Mae Siman De Los Santos
