ROXAS CITY – Patay ang mag-asawa, samtang pilason naman ang ila bata nga babayi, matapos nga mabungguan ang ila ginasakyan nga motorsiklo, sa national highway sang Barangay Bolo, Roxas City, kaina nga ala-1:45 sa kaaganhon, Mayo 19.
Ginkilala ang mga napatay nga sanday Arante Cordenillo Tumanday kag Erlyn Castillo Tumanday, lunsay sa legal nga pang-edaron.
Samtang, pilason naman ang ila anak nga si Aryan Aline Castillo Tumanday, 22 anyos, nga mga residente sang Barangay Rizal, Pontevedra, Capiz.
Ginkilala ang suspek kay Joselito Caballero Dela Cruz, 24 anyos, nga residente sang Sitio Crossing, Brgy. Cagay, sini man nga syudad.
Sandig sa inisyal nga imbestigasyon ni PSSg. Joerge Catalan, traffic investigator sang Roxas City PNP, nagaguwa nga samtang ginasubay sang driver sang Motorstar nga si Tumanday sakay ang iya mag-iloy, nga nagikan sa Roxas City kag papuli sa Pontvedra, sang nagpang-agaw sang linya sang karsada ang kasugata nga Euro 125 nga motorsiklo nga ginamaneho ni Dela Cruz.
Bangud diri, head on collision ang natabo nga ginkapilas sang magtimbang nga mga sakay sang motorsiklo.
Gindala sang Capiz Emergency Response Team (CERT) ang padre de pamilya sa RMPH apang gindeklarar nga dead on arrival sang doktor.
Samtang sa Capiz Doctors Hospital naman gindala sang Roxas City Emergency Response team (RCERT) ang Iloy nga si Erlyn, apang dead on arrival man ini suno sa doktor.
Nag-angkon man sang kapilasan sa iya agtang, nawala nga tiil kag magkatuhay nga parte sang lawas si Aryan, kag sa karon padayon nga ginabulong sa nasambit man nga pribado nga ospital.
Samtang si Dela Cruz ang nag-angkon sang kapilasan sa lawas nga ginpadangat sang iya mga abyan sa Capiz Health Centrum.
Naka-hospital arrest naman ang suspek kag nahibaluan nga yara ini sa impluwensiya sang makahulubog nga ilimnon sang nagluntad ang insidente.
Magapangatubang sang kaso nga Homicide, physical injury and damaged to property ang nasambit nga driver sang Euro.
