ROXAS CITY – Nagapati si Baltazar Saldo sang Barangay Sto. Angel, Dumalag, Capiz nga bangud sa ila magkatunog nga hayo sang isa ka kilala nga lider sang rebelde nga grupo rason nga nasal-an ini kag ginserbihan sang apat ka warrants of arrest sang mga miyembro sang Police Regional Office 6 – Regional Intelligence Division kag Philippine Army 61st Infantry Battalion.
Suno kay Saldo nga mas kilala sa tawag nga ‘Asan’, halos magkapareho ang tunog sang iya hayo sa ‘Ka Hasan’ kun sa diin mas kilala ang wanted nga si Virgilio Paragan, commanding officer sang Roger Mahinay Command, Komiteng Rehiyon-Negros sang Communist Party of the Philippines-New People’s Army (CPP-NPA).
Suno sa iya nga una may nagpalapit sa iya nga isa ka lalaki kag nagpakilala nga iya paryente sa Negros Oriental nga iya ginkatingala bangud wala man ini sang kakilala sa amo nga lugar.
Dugang pa sini nga ginpamangkot siya kun siya si ‘Ka Hasan’ kag nagsabat man ini sang ‘oo’ bangud sa iya pamatian, ‘Asan’ ang ginatumod nga pangalan sang nagpalapit sa iya.
Makaligad ang pila ka oras, hinali na lamang may nag-untat nga itom nga salakyan sa iya atubang kun sa diin naguha ang armado nga mga kalalakinhan kadungan sang pagpahapa kag pagposas sa iya.
Apisar nagpakita ini sang identification card kag iban pa nga dokumento nga nagapamatuod nga indi siya ang NPA leader, nagpanindugan sa gihapon ang mga otoridad sa pagdakop sa iya.
Mahibaluan nga ang wanted nga lider sang rebelde nga grupo nga si ‘Ka Hasan’ ang may yara na sang patong sa ulo nga nagalab-ot sa masobra isa ka milyon ka pesos.
