ROXAS CITY – Indi pag-suportahan sang Magnificent 7 sa Kamara ang plano sang pila ka mga kongresista nga pag-postpone sa 2019 midterm elections.
Ini ang ginpahayag ni Capiz 1st District Representative Emmanuel ‘Tawi’ Billones Sr. sang mainterview sang Bombo Radyo.
Suno kay Billones, lunsay mga 3rd termer lamang ang nagaduso sa nasambit nga plano bangud posible suno sa iya sa rason nga yara na sila sa ila ulihi nga termino.
Ginpahayag ni Billones nga nagapati sila sang iya mga kaalyado nga kinahanglan mahatagan sang kahigayunan ang pumuluyo nga makapili sang lider nga makaserbisyo sa ila.
Mahibaluan nga ginkompirmar mismo ni Billones sa Bombo Radyo nga may pila ka mga Kongresista sa Manubo nga Panalgan sang Kongreso ang nagaplano nga iduso ang pagpaiway sa nasambit nga piniliay.
